أكبر ٣ إنجازات عربية

- أكبر ٣ إنجازات عربية بالنسبة له : كارتون كابتن ماجد وأغنية بولة بولة ولعبة كيلو بامية .. وأما كبر اكتشف إن كابتن ماجد أنمي ياباني وإن بولة بولة أغنية إيطالي واسمها فولا فولا وإن كيلو بامية أصلها فرنسي ومش اسمها كيلو بامية أساساً. - الطفل الوحيد في العالم اللي فهم نظريات الماسونية ومؤامرات الصهيونية العالمية وهو عنده عشر سنين .. أقنعوه في المدرسة إن بوكيمون كارتون عبري وإن بيكاتشو معناها أنا يهودي وأهله خدوا منه كل اللي كسبه في أكياس اللايز عشان فيها مواد مشعة .. وكان بيقضي وقت فراغه يحط إزازة كوكاكولا قدام المراية عشان يدور على "لا محمد لا مكة" أو يدوس في الرمل بشبشب نايك عشان يدور على "الله" اللي الصهاينة كانوا بيكتبوها على أرضية الشباشب. - بخلاف كل البشر على كوكب الأرض فهو الوحيد اللي كان بيقلب كيس البيست عشان يحط فيه الشفاطة "الشاليموه لبتوع المدارس الأجنبية والماصة لأحفاد سيبويه" .. أظن المشكلة كانت في الكيس نفسه لأن الموضوع ده استمر معاه وهو كبير. - من صغره اتعلم يستغل البيئة المحيطة بيه ويعمل ريسيكلينج "إعادة تدوير" للأشياء المحيطة بيه .. غطيان الحاجة الساقعة خرمها وركب فيها عصاية عمل منها العجلة .. جمع نوى الخوخ والمشمش ولعب بيه بلي في الأوقات الصعبة. - الحقيقة اللي حاولت كتب التاريخ إخفاءها هي إنه كان مصدر الحكمة الشهيرة "لا يأس مع الحياة ولا حياة مع اليأس" .. أكتر كائن بشري اشترى علب الشمعدان عشان يجمع العربية وصرف فلوسه على أزايز الحاجة الساقعة عشان يجمع العجلة .. وكل مرة يلاقي نفس القطعة ويصبر نفسه وهو بيشتري العلبة التانية إنه أكيد هيوصل لواحد محتاج القطعة دي ويبدلها معاه .. ويكتشف في النهاية إن مصر كلها بتكسب قطعة واحدة من كاوتش العربية وجدون العجلة .. طبعاً عمره ما استسلم للإحباطات دي وأما كبر شوية بقى يشتري قلبظ ويدور ع الكورة السحرية .. ومين فينا متصاحبش ع البياع عشان يسيبه يحس كل الأكياس وينقي الكيس اللي فيه المكسب . - أكتر تلات ألغاز في حياته كانت : مازنجر بيحب أفروديت على إيه .. وربيع الحارس في كابتن ماجد هيخف من الإصابة إمتى .. وأنور وجدي شعره بيتسرح لوحده إزاي بعد ما يضرب العصابة. - كان بيستنى رمضان عشان بوجي وطمطم وعم شكشك وبيستنى المولد النبوي عشان العروسة الحمرا .. وأهله كانوا بيقولوا فيها ألوان صناعية ومش هنشتريها. - شاف جيرسي وماندولين وهما في حجم مورو النهارده .. واشترى قلبظ بربع جنيه وكان أكبر من الشيبسي العائلي الأيام دي. - أكتر لعبة كانت بتبهره في العالم هي الأتاري المحمول .. جهاز بحجرين وأسهم وشوية زراير وشاشة صغيرة عليها العاب من مربعات سودة جنب بعضها بيقعد يتخيل إنها بترسم أشكال لعربيات وطيارات ووحوش. - آخره في الصياعة كانت رقصة ماكارينا اللي ظهرت واختفت في ظروف غامضة .. وأمنيته الدراسية كانت إنه يوصل لتالتة إعدادي عشان يتفرج على درس التكاثر في كتاب العلوم . - أول طفل في العالم يكتشف إن الحرارة والحركة بتغطي على الإحساس بالألم .. كان بينفخ في إيده قبل ما يمدها للخرزانة ويقعد يحركها بعد ما يستلم العلقة التمام .. وطبعاً أكتر كلمة كان بيقولها لما يتسأل عن الواجب والكراسة : نسيته ونسيتها .. وأول ما يسمع المدرسة بتقول : نسيت تاكل،، نسيت تشرب .. يقوم بعملية الإحماء السابق ذكرها . - أدخل مصطلحات حصرية في قوانين كرة القدم زي فاول لفظ وفاول كوتشي .. واخترع مكان جديد في اللعبة اسمه الجون المشترك اللي كل فريق كان شايف إنه بيلعب الكورة للفريق التاني وهو هدفه الوحيد إنه يدخل الاجوان في نفسه عشان ينزل مكان المغلوب. - البرازيل كانت بالنسبة للعالم كله بلد فيها بن وبتاخد كاس العالم لكن بالنسبة له كانت منشأ لعبة برازيلي".. ودي لعبة تضاف الاكتشافات المصرية برضه .. اتنين بيرفعوا لبعض ويجيبوا إجوان في التالت .. الرجل باتنين والراس بتلاتة والكعب بستة والكتف زيه.. المهم نخلص ١٢ نقطة. - أكتر لعبة اشتراها هي المسدسات وكانت أمنية جيله كله وهو في الحضانة إنه يطلع ظابط شرطة .. لما كبر عرف إن ظباط الشرطة في الحقيقة بيقوموا بدور محمود المليجي مش فريد شوقي كل الشكر للعضو صاحب البوست اللي رجعنا لذكريات رغم انها بسيطه واقرب الي ان تكون سذاجه اللي اننا كجيل افتقدنها